Sepleriň elýeterliligi

Yrakdaky koalision hökümet düzmek gepleşikleri şowsuz


Duşenbe güni Yragyň ozalky premýer-ministri Iýýad Allawynyň «Irakiýa» partiýasy ýurduň häzirki premýer-ministri Nury al-Mälikiniň «Kanunçylyk döwleti» atly syýasy blogy bilen koalision hökümet düzmek baradaky gepleşiklerden ýüz öwürdi.

«Irakiýa» partiýasynyň metbugat sekretary Maýsun al-Damluji premýer-ministr Nury al-Mälikiniň telewideniýede eden çykyşynda «Irakiýa» partiýasyny «sünnüleriň partiýasy» diýip atlandyrmak bilen, bu partiýany kemsidendigini aýtdy.

Maýsun al-Damluji «Irakiýa» partiýasynyň sünni partiýasy däl-de, eýsem milli ideýalary goldanýan proýektdigini öňe sürdi. Şeýle hem, ol premýer-ministr Nury al-Mälikiniň diňe bir «Irakiýa» partiýasynyň öňünde däl, eýsem, bu partiýany goldaýjylaryň hemmesiniň öňünde ötünç soramalydygyny aýtdy.

Yragyň ozalky premýer-ministri Iýýad Allawynyň «Irakiýa» partiýasy şu ýylyň mart aýynda geçirilen saýlawlarda 325 orunlyk parlamentde 91 orny aldy. Premýer-ministr Nury al-Mälikiniň «Kanunçylyk döwleti» atly syýasy blogy bolsa, 89 orna eýe boldy.

Bu iki partiýanyň koalision hökümet düzmek ugrundaky gepleşikleri indi bäş aýdan gowrak wagt bäri oňyn netije bermän gelýär.
XS
SM
MD
LG