Owganystanyň resmileri ýurduň demirgazyk-gündogaryndaky Badahşan welaýatynda “Talyban” hereketiniň ýerli komandiriniň öldürilendigini habar berýärler.
Badahşan welaýat häkimliginiň metbugat wekili Abdul Nawid Frotan (Abdul Naweed Froutan) özüniň 10-njy iýulda beren maglumatynda Kair Fasih-u-diniň (Qari Fasih-u-din) 9-njy iýulda Juram etrabyndaky çaknyşyklarda öldürilendigini aýtdy.
Frotanyň sözlerine görä, bu çaknyşyklarda başga-da dört “Talyban” söweşijisi we dört owgan esgeri ýaralanypdyr.
Fasih-u-din “Talybanyň” Badahşan welaýatyndaky resmi bolmadyk häkimidi we onuň 6-njy iýulda bolan çaknyşyklarda ýaralanandygy habar berlipdi.
Bu çaknyşyklar “Talyban” we beýleki söweşijiler Owganystanyň ençeme territoriýasyndaky howpsuzlyk güýçlerine garşy hüjümlerini artdyran mahaly bolup geçýär. Birleşen Ştatlar we ýaran güýçler 2014-nji ýylyň ahyryna çenli Owganystany terk etmegi planlaşdyrýarlar. Bu wakanyň öň ýanynda “Talyban” we beýleki söweşijiler ýurduň esasy gatnaw ýollarynyň we beýleki territoriýalarynyň kontrollygyny ele salmaga synanyşýarlar.