Birleşen Milletler Guramasynyň Howpsuzlyk geňeşi Gazada adam ýitgileriniň artmagy bilen baglanyşykly aladalanma bildirip, harby hereketleriň togtadylmagy üçin çagyryş etdi.
BMG-niň baş sekretary Ban Ki-mun (Ban Ki-moon) Ysraýylyň hüjümleri netijesinde Gaza zolagynda onlarça palestinalynyň öldürilmegini “wahşy hereket” diýip ýazgarandan soň, 20-nji iýulda guramanyň howpsuzlyk geňeşi adatdan daşary ýygnagyny geçirdi.
Şeýle-de, Ban Katarda eden çykyşynda takmynan iki hepde bäri dowam edýän söweşleriň derhal togtadylmagy üçin çagyryş etdi. Bu çaknyşyklarda 500-den gowrak adam heläk boldy.
Gaza zolagy bilen Ysraýylyň arasyndaky söweşleriň 13-nji gününde, ýagny 20-nji iýulda bolan çaknyşyklarda 60-dan gowrak palestinaly we 13 sany ysraýylly esger öldürildi.
Bu aralykda Ysraýylyň Birleşen Milletler Guramasyndaky ilçisi “Hamas” toparynyň ýaragly ganaty tarapyndan ysraýylly esgeriň alnyp gaçylandygy baradaky maglumatlary inkär etdi.