ABŞ-nyň goranmak sekretary Çak Hagel (Chuck Hagel) öňünden yglan edilmedik sapary bilen Yraga bardy.
Bu ABŞ Yrakda öz harby missiýasyny tamamlandan soň, 2011-nji ýylyň dekabr aýyndan bäri Pentagonyň ýolbaşçysynyň Yraga edýän ilkinji saparydyr.
Hagel Yragyň hökümet resmileri we ABŞ-nyň harby ýolbaşçylary bilen duşuşyk geçirer.
8-nji dekabrda Kuweýtde eden çykyşynda Hagel Yragyň demirgazygynda we Siriýada uly giňişlikleri basyp alan “Yslam döwletine” garşy ABŞ-nyň howadan amala aşyrýan hüjümleriniň Yragyň howpsuzlyk güýçleri üçin täze mümkinçilik berýändigini aýtdy.
Hagel 24-nji noýabrda wezipesinden çekilen hem bolsa, öz ýerine täze ýolbaşçy tassyklanýança wezipe borçlaryny ýerine ýetirýär.
Prezident Barak Obama ABŞ-nyň goranmak sekretary wezipesine Aşton Karteri hödürledi.