Azerbaýjanyň we Ermenistanyň resmileri 1994-nji ýylda gelnen ok atyşygy bes etmek baradaky ylalaşygy bozmak barada bir-biriniň adyna täze aýyplamalary öňe sürdüler.
26-njy ýanwarda Azerbaýjanyň Goranmak ministrligi Ermenistanyň harbylarynyň soňky 24 sagadyň dowamynda ýaraşygy 124 gezek bozandygyny aýtdy.
Şol bir wagtda-da Ermenistanyň Goranmak ministrliginiň metbugat-wekili Artsrun Howannisian Azerbaýjan bilen serhetde, Azerbaýjanyň elindäki giňişligiň we etnik ermenileriň elindäki Daglyk Garabagyň araçäginde “Ermenistanyň goşunlary ýagdaýa doly gözegçilik edýärler”, diýip 26-njy ýanwarda Facebookda ýazdy.
24-nji ýanwarda Daglyk Garabagyň goranmak ministrligi Azerbaýjanyň ok atyşygy bes etmek barada bar bolan ylalaşygy geçen hepdede 1 800 bozandygyny we 14 azerbaýjanly esgeriň öldürilendigini aýtdy.
Baku we Ýerewan Azerbaýjanyň separatist Daglyk Garabag regionynyň üstünde ençeme ýyl bäri dawalaşyp gelýärler. Ermenistan tarapyndan goldanýan separatistler 1990-njy ýyllaryň başynda bolan we 30 000 adamyň ölümine sebäp bolan urşuň netijesinde esasan ermeni ilatly regiony Azerbaýjandan bölüp alypdy. Diplomatik tagallalar uly netije bermedi.