Russiýanyň Federal Migrasiýa gullugynyň (FMG) resmisi 300 müň çemesi ukrain raýatynyň Russiýadan wagtlaýyn gaçybatalga ýa-da bosgunlyk statusyny sorandygyny aýtdy.
Russiýanyň Federal Migrasiýa gullugynyň Raýatlyk boýunça departamentiniň başlygy Walentina Kazakowanyň 16-njy fewralda beren maglumatyna görä, Russiýada 260 müňden gowrak ukrain raýaty eýýäm gaçybatalga ýa-da bosgunlyk statusyna eýe boldy.
Rus hökümetiniň ýaýradan bu sanlaryny tassyklatmak başartmady we ukrain hökümeti bu barada maglumat ýaýratmady.
Şeýle-de, Kazakowa 900 müňden gowrak bosgunyň gündogar Ukrainadaky orsparaz separatistler bilen ukrain armiýasynyň arasyndaky harby konfliktden gaçyp, Russiýa barandygyny belledi.
Kazakowanyň berýän maglumatyna görä, 2014-nji ýylda 70 müň çemesi ukrain raýaty Russiýanyň raýatlygyny almak üçin rus resmilerine ýüzlenipdir.