Gyrgyzystanyň polisiýasy ýurtda gadagan edilen “Hizb ut-Tahrir” yslamçy toparynyň aýallar bileleşigine ýolbaşçylyk edýär diýilýän zenany tussag etdiler.
Gyrgyz Içeri işler ministrliginiň 18-nji martda ýaýradan maglumatynda ady köpçülige mälim edilmeýän zenanyň 2013-nji ýyldan bäri gözlenýändigi bellenilýär.
Ministrligiň maglumatyna görä, gürrüňi gidýän zenan 17-nji martda Batken welaýatynda ýerli polisiýanyň gatnaşmagynda geçirilen barlaglar döwründe tussag edilipdir.
Şeýle-de ministrlik welaýatda geçirilýän barlaglaryň, tussaglykdaky ýerli dini lider Raşod Kamalowyň sud işiniň derňewleri bilen ilteşiklidigini habar berdi. Kamalow “Hizb ut-Tahrir” topary bilen ilteşigi barlykda aýyplanyp, geçen aý tussag edilipdi.
Soňky hepdelerde Gyrgyzystanda “Hizb ut-Tahrir” toparynyň we ýurtda gadagan edilen beýleki yslamçy toparlaryň agzasy diýlip aýdylýan adamlaryň tussag edilýändigi baradaky maglumatlar artdy.