Pakistanyň resmileri “Talyban” hereketiniň aýry-aýrylykda eden iki hüjüminde ýedi polisiýa ofiseriniň öldürilendigini aýdýarlar.
27-nji martda ir bilen Karaçi şäherindäki bomba partlamasynda iki polisiýa ofiseriniň öldürilendigini we başga-da 14 sanysynyň ýaralanandygyny, ýerli resmiler habar berýärler. Olaryň aýtmagyna görä, motosiklli bombaçy polisiýa ofiserlerini tälim beriji akademiýa alyp barýan awtobusyň gapdalynda özüni partladypdyr.
Karaçi şäherindäki bu hüjüm, ýurduň günorta-günbataryndaky Balojistan welaýatynda polisiýanyň ulagyna ot açylmagy netijesinde bäş polisiýa işgäri ölenden we başga-da bir sanysy ýaralanandan birnäçe sagat soň boldy.
Balojistan welaýatynyň içeri işler boýunça departamenti bu hüjümiň 26-njy martda Loralaý etrabyndaky Ça Çailo sebitinde bolandygyny habar berdi.