Russiýanyň metbugat gulluklary Birleşen Ştatlaryň Döwlet sekretary Jon Kerriniň Ukrainadaky, Siriýadaky we Ýemendäki durnuksyzlygy maslahat etmek üçin, 12-nji maýda Gara deňziniň kenaryndaky Soçi şäherinde rus kärdeşi Sergeý Lawow bilen duşuşjakdygyny habar berýärler.
Russiýanyň döwlete degişli “RIA-Novosti” habar gullugynyň ady köpçülige mälim edilmeýän bir çeşmä salgylanyp berýän maglumatynda, Kreml gündogar Ukrainadaky konfliktiň çözülmegi dogrusynda Kerri täze teklipleri hödürlär diýip umyt edýär diýilýär.
Şeýle-de, gürrüňi edilýän çeşmäniň aýtmagyna görä, Lawrow amerikan kärdeşi Kerrä Ukraina harby kömegiň ugradylmagynyň kabul ederlikli däldigini aýtmagy planlaşdyrýar.
Russiýa Waşingtonyň Ukrainanyň goşunyny türgenleşdirmek barada ýakynda eden tagallalaryny tankyt edipdi.