Türkiýäniň premýer-ministri Ahmet Dawutoglu öz ýurdunyň demirgazyk Siriýada, serhediň aňry ýüzünde bosgunlaryň Siriýanyň hökümet güýçleriniň ýa-da «Yslam döwleti» jeňçileriniň hüjüminden aman galyp biljek howpsuz zonasyny döretmekçi bolýandygyny aýdýar.
Dawutoglu 11-nji awgustda giçlik BBC-ä bu howpsuz zonanyň Türkiýäniň goşunlary bilen däl-de, eýsem Siriýanyň «aram» oppozisiýa toparlary tarapyndan goraljagyny aýtdy. Ýöne ol Türkiýäniň, eger wehim salynsa, harby güýç ulanjagyny aýtdy.
Türkiýäniň Daşary işler ministrligi 11-nji awgustda irden Birleşen Ştatlar bilen Türkiýäniň 98 km uzynlykda, 45 km giňlikde bir howpsuz zona döredip, bu zonanyň «Azat Siriýa goşuny» tarapyndan goralmagy barada ylalaşandyklaryny aýtdy.
Türk-siriýa serhediniň boýundaky bu uzan zolak YD jeňçileriniň kontroly astynda ýerleşýär.
Emma ABŞ-nyň Döwlet departamentiniň sözçüsi Mark Toner: "Munyň ýaly bir zona barada ylalaşyk ýok» diýdi.