Eýranly meşhur hudožnik we aktiwist Atena Farghadaniniň aklawçysy öz müşderisiniň häkimiýetler tarapyndan tiz wagtda boşadyljakdygyny aýtdy.
Mohammad Moghiminiň “The Associated Press” agentligine we Karikaturaçylaryň hukuklary boýunça halkara guramasyna 25-nji aprelde aýtmagyna görä, şikaýatlara garaýan sud Farghadaniniň 12 ýyllyk we 9 aýlyk tussaglyk möhletini 18 aýa çenli azaldypdyr.
Bu bolsa onuň tiz wagtda boşadyljagyny aňladýar diýip aklawçy belledi.
Moghimi öz müşderisiniň türmeden boşadylmagynyň takyk wagtynyň entek belli däldigini aýtdy.
2014-nji ýylda Farghadani zenanlaryň çaga dogurmak meselesindäki hukuklaryny çäklendirýän kanuny kabul eden eýranly syýasatçylary geçi we maýmyn hökmünde şekillendirmegi üçin sud edilipdi.