Birleşen Milletler guramasynyň resmilerinden ybarat topar Eýranda öňdebaryjy hukuk goraýjy aktiwistiň ölüm jezasyny ýatyrmak baradaky kampaniýa goşulandygy üçin türmä basylmagyny ýazgardy.
Adam hukuklaryny goraýan merkeziň başlygynyň orunbasary Narges Mohammadi 18-nji maýda on ýyl türme tussaglygyna höküm edildi.
Ol eýýäm alty ýyl türme tussaglygyny çekip otyrdy. BMG-niň adam hukuklary boýunça Eýrandaky hasabatçysy Ahmed Şahid 20-nji maýda Narges Mohammadiniň türmede 16 ýyl däl, bir sagat artyk saklanmagyna-da düýpden sebäp ýok diýdi.
Şahid Eýranyň prezidenti Hassan Rohanini we beýleki resmileri Mohammadiniň derhal we hiç bir gep-gürrüňsiz azat edilmegi üçin ellerinden gelen ähli zady etmeklerine çagyrdy.
BMG-niň Adam hukuklary geňeşiniň ýörite proseduralarynyň ekspertleri hem 20-nji maýda Tährany eden-etdilikli we bikanun tussag edilen ähli žurnalistleri, hukuk goraýjylary boşatmaga çagyrdylar.