Ukrainanyň harby awiatory, maýda deputat kasamyny kabul eden Nadia Sawçenko, ýurduň syýasatyna «täze gan» getirmek üçin, irki parlament saýlawlarynyň geçirilmegi gerek diýýär.
Sawçenko bu pikiri AP habar gullugy bilen 10-njy iýunda eden söhbetdeşliginde aýtdy.
«Ukrain halky häzirkisinden has gowy hökümete mynasyp» diýip, ol aýtdy.
Sawçenko Kiýewdäki hökümetiň jemgyýetçiligiň 2014-nji ýylyň fewralynda çetleşdirilen orsýetçi hökümetden soň garaşan işlerini etmegiň hötdesinden gelmändigini aýtdy.
Sawçenko iki ýyla golaý rus tussaghanasynda oturdy we maýda, tussag çalşylmagy netijesinde, Kiýewde gahryman hökmünde garşy alyndy.