Gyrgyzystanyň howpsuzlyk resmileri 600 çemesi gyrgyz raýatynyň Siriýada we Yrakda yslamçylara goşulandygyny aýdýarlar.
Gyrgyzystanyň Milli howpsuzlyk komitetiniň metbugat-wekili Rahat Sulaimanowyň 3-nji awgustda Azat Ýewropa/Azatlyk Radiosyna aýtmagyna görä, agzalan san 100 çemesi zenany öz içine alýar.
Sulaimanow soňky ýyllarda yslamçy söweşiji toparlaryň düzüminde söweşen 70 gyrgyz raýatynyň öldürilendigini habar berdi.
Şeýle-de ol Siriýada we Yrakda söweşen 20 gyrgyz raýatynyň Gyrgyzystana dolanyp barandygyny aýtdy.
Mundan ozal gyrgyz resmileri Ýakyn Gündogar ýurtlarynda yslamçy söweşijilere goşulan gyrgyz raýatynyň sanynyň 500 çemesi diýip habar beripdiler.