Orsýet TOPH proýektine gatnaşmaga taýýardygyny aýtdy.
Interfaks agentliginiň maglumatyna görä, Orsýet Federasiýasynyň Owganystandaky ilçisi Andreý Awetisýan bu barada Owganystanyň Moskwadaky ilçisiniň orsýet işewürlerine ýüzlenip, olary dürli ýyllarda SSSR-iň we Orsýetiň kömegi bilen Owganystanda gurlan obýektleri dikeltmek üçin maýa ýatyrmaga eden çagyryşyny kommentirläp eden çykyşynda aýdypdyr.
Şeýle-de Orsýet köptaraplaýyn proýektlere, şol sanda Gyrgyzystandan we Täjigistandan Owganystanyň we Pakistanyň üstünden geçýän elektrik geçiriji liniýalaryň gurluşygy boýunça köptaraplaýyn proýekte gatnaşmaga taýýar, şeýle hem beýleki köptaraplaýyn proýekt – Türkmenistandan Owganystanyň we Pakistanyň üstünden Hindistana tarap TOPH gaz geçirijisiniň gurluşygyny goldaýar we oňa gatnaşmaga taýýar diýip, A.Awetisýana slagylanyp Interfaks habar berýär.
Şol bir wagtda-da orsýet ilçisiniň Owganystanda howpsuzlyk bilen bagly ýagdaýyň “gowulanmak däl-de, mundan beýläk has-da ýitileşmegine berk tendensiýa bar” diýip, belländigi maglumatda aýdylýar.
Gurluşygyna 2015-nji ýylyň aýagynda badalga berlip, türkmen gazyny Owganystanyň üstünden Pakistana we Hindistana akdyrmaga mümkinçilik berjek gazgeçirijiniň ulanyşa berliş möhletiniň 1 ýyl, ýagny 2020-nji ýyla çenli yza çekdiriljegi 30-njy ýanwarda habar berlipdi.
Resmi Aşgabat umumy bahasy 10 milliard dollarlyk TOPH proýektiniň çykdajylarynyň 85% töwereginiň Türkmenistan tarapyndan üpjün ediljekdigini yglan edipdi.
Uzynlygy 1814 kilometrlik gaz geçiriji arkaly ýylda 33 milliard m3 gazy akdyrmak göz öňünde tutulýar.
