Gazagystanyň hökümeti Yahoo portalyna kiber hüjümi etmekde ABŞ-nyň häkimiýetleri tarapyndan günälenýän adamlaryň biri Karim Baratowyň gazak raýaty däldigini aýtdy.
ABŞ-nyň Adalat departamentiniň 15-nji martda eden beýannamasynda 22 ýaşly Baratow “Kanadada ýaşaýan, Kanadanyň we Gazagystanyň raýaty” diýildi.
Gazagystanyň Daşary işler ministrliginiň 16-njy martda aýtmagyna görä, Gazagystanda doglan Baratow Kanadanyň raýatlygyny alyp, 2011-nji ýylda gazak raýatlygyny ýitiripdir.
Gazagystan goşa raýatlygy ykrar etmeýär.
ABŞ-nyň Adalat departamenti Baratowyň we üç orsýetliniň, şol sanda Orsýetiň Federal howpsuzlyk gullugynyň (FSB) iki ofiseriniň 2014-nji ýylda Yahoo edilen hüjüme gatnaşygynyň bardygyny aýdýar.