Liwan: Çaknyşykda 12 adam öldi

Ýekşenbe güni Liwanyň Sidon şäherinde ýurduň harby güýçleri bilen sünni musulman ruhanylaryna eýerýänleriň arasynda çaknyşyklar boldy. Port şäheri Sidondaky şol çaknyşyklarda azyndan 12 adamyň heläk bolandygy habar berilýär.

Agzalýan territoriýada sünni we şaýy musulman şöweşijileriň arasynda goňşy Siriýadaky konfliktler sebäpli geçen hepdeden bäri dartgynlyk dowam edýärdi.

Häzirki wagtda Liwanyň ýolbaşçylary çaknyşyklaryň soňuna ýetmäge synanyşýarlar.

Ýekşenbe günki çaknyşyklar harby barlag nokadynda polisiýanyň radikal ruhana eýeriji Şeýh Ahmet al-Assiri tusag etmegi bilen başlapdy.

Şondan soňra Assiriň tarapdarlary ar-almak üçin howpsuzlyk güýçlerine hüjüm edip, tutuş Liwandaky tarapdarlaryna köçä çykmaga çagyryş etdiler.

“Reuters” habar gullugynyň berýän maglumatyna görä, çaknyşyklarda on adam ölüp, 40-sy hem ýaralanypdyr.