Birleşen Ştatlar özüniň Owganystandan goşun çykarmak planlaryny üýtgetdi we indi galan goşunlarynyň köpüsini indiki ýyla çenli ol ýerden çykarman saklamakçy bolýar.
14-nji martdaky habarlarda entek gutarnykly kararyň alynmandygy, emma ABŞ adminstrasiýasynyň häzir Owganystanda ýerleşýän 9800 esgeri ol ýerden çykarmagy haýallatmaga taýýarlanandygy aýdyldy.
Plan boýunça ol ýerdäki goşunlar 2015-nji ýylyň aýagyna çenli 5500 çemesi kemeldilmelidi.
ABŞ-nyň goranmak resmileri we owgan prezidenti Aşraf Gani prezident Barak Obamany Owganystandan goşun çykarmagyň möhletleri baradaky meselä gaýtadan seretmäge çagyrýarlar.
Olar ýurtdaky howpsuzlyk ýagdaýynyň şindi durnukly däldigini, regionyň diňe «Al-Kaýda» däl, eýsem YD howpy bilen hem ýüzbe-ýüz bolmagynyň ahmaldygyny öňe sürýärler.
Obama planlaryň üýtgemegini aýyň aýagynda, prezident Ganiniň Waşingtona sapary mahalynda yglan eder öýdülýär.