Gyrgyzystanyň prezidenti Almazbek Atambaýew hökümetiň ABŞ bilen uzak wagtlyk hyzmatdaşlyk ylalaşygyny ýatyrmak baradaky kararyny goldap çykyş etdi.
Atambaýew Waşingtony Gyrgyzystanda milletara deňagramlylygy bozmak maksatly “prowokasiýa” etmekde aýyplady.
Bişkek ABŞ-nyň tussaglykdaky gyrgyz aktiwisti Azimjon Askarowy adam hukuklary boýunça abraýly baýrak bilen sylaglamak kararyna protest bildirip, ABŞ bilen hyzmatdaşlyk barada 1993-nji ýylda baglaşylan ylalaşygy ýakyn günlerde formal taýdan ýatyrdy.
64 ýaşly Askarow 2010-njy ýylda Gyrgyzystanyň günortasynda 400-den gowrak adamyň ölümine getiren etnikara çaknyşyklaryň dowamynda tussag edilipdi we ömürlik tussaglyga höküm edilipdi.