Türkiýäniň prokurorlary ýurduny terk eden dinçi Fethullah Gulene garşy 2 527 sahypalyk aýyplamalaryň toplanandygyny habar berdiler. Resmiler Guleni geçen aýda 240 adamyň ölümine sebäp bolan başa barmadyk harby agdarylyşygy amala aşyrmak synanyşygyna gatnaşmakda güman edýärler.
16-njy awgustda çap edilen aýyplamada Guleniň “güýç bilen konstitusion düzgüni ýumurmaga synanyşygy” we “ýaragly terrorçy topary düzmegi hem dolandyrmagy” üçin ony ömürlik türme tussaglygyna iki gezek höküm etmegi, şeýle-de oňa goşmaça 1900 ýyl türme tussaglygynyň berilmegi talap edilýär.
ABŞ-da ýaşaýan Gulen başa barmadyk agdarylyşyga gatnaşygyny doly ret edýär.
Şeýle-de 18-nji awgustda Türkiýäniň polisiýasy 120 sany biznes ýolbaşçysyny tussag etmäge resminamanyň berilmeginiň yzýany Stambulda 44 şirketde reýd geçirdi.
Ýewropanyň Žurnalistler federasiýasy Türkiýede 68 žurnalistiň tussag edilendigini habar berdi.
15-nji iýuldan bäri Türkiýede 35 müňden gowrak adam saklandy, şol sanda 17 müň adam tussag astynda galýar, onlarça müň adam işden boşadyldy.