Pakistanda goýy ümür sebäpli bolan ýol heläkçilikleriniň netijesinde azyndan 10 adamyň ölendigi we başga-da ençemesiniň ýaralanandygy habar berilýär. Bu ýol heläkçilikleriniň 25-nji dekabrda Yslamabadyň günortasyndaky Punjab welaýatynda bolandygy aýdylýar.
Pakistanyň häkimiýetleri Hafizabad sebitinde ümürli howa şertleri sebäpli awtobusyň düňderilendigini we munuň netijesinde alty adamyň ölendigini we başga-da 10 sanysynyň ýaralanandygyny aýtdylar.
Şeýle-de, Multan şäheriniň golaýyndaky Hanewal etrabynda iki ýük ulagynyň we bir awtobusyň çaknyşmagy netijesinde bir adam öldi we başga-da ýedi sanysy ýaralandy.
Faýsalabad şäheriniň golaýyndaky Manawala sebitinde motosiklli bir adamyň ulag bilen çaknyşmagy netijesinde motosikliň sürüjisi heläk boldy, ulagdaky ýolagçylar ýaralandy.