Özbegistanyň “Uzbekenergo” kompaniýasy we Türkmenistanyň energetika ministrligi elektrik energiýasynyň tranziti we akdyrylmagy barada şenbe güni ylalaşyk baglaşdylar.
Media maglumatlaryna görä, Türkmenistanyň we Özbegistanyň prezidentleriniň 20-nji maýda Awazada geçiren duşuşygynyň yzýany baglaşylan ylalaşyga Türkmenistanyň energetika ministri Çarymyrat Purçekow we Özbegistanyň wise-premýeri Gulomjon Ibragimow gol çekipdir.
Ylalaşygyň Türkmenistandan elektrik energiýasynyň Özbegistanyň energosistemasy arkaly Gazagystana we Gyrgyzystana geçirilmegini göz öňünde tutýandygy media serişdeleri habar berýärler.
Şeýle-de ylalaşyk “Türkmenenergo” kompaniýasynyň “Özbekenergo” kompaniýasynyň öňündäki bergisiniň hasabyna ylalaşylan bahadan elektrik energiýasyny bermek boýunça meseläni öz içine alýar diýip, gazeta.uz neşri Özbegistanyň prezidentiniň apparatyna salgylanyp, habar berýär.