Orsýet öz söweş uçarlarynyň Müsüriň harby bazalaryny ulanmagy barada Müsür bilen ylalaşygyň taslamasyny tassyklady. Orsýet bu çäresini Ýakyn Gündogarda harby täsirini artdyrmak boýunça tagallalarynyň çäginde amala aşyrýar.
Ylalaşygyň taslamasy 30-njy noýabrda premýer-ministr Dmitriý Medwedew tarapyndan gol çekilensoň çap edildi. Dokumente laýyklykda Orsýetiň goranmak ministrligi Müsüriň hökümeti bilen ylalaşygyň detallaryny maslahat edýär.
Taslamadaky plana laýyklykda, ýurtlaryň harbylaryna bir-biriniň howa bazalaryny ulanmaga bäş ýyl möhleti bilen rugsat berilýär, wagt möhletiniň ýene uzaldylmagy göz öňünde tutulýar.
Orsýet Ýakyn Gündogardaky harby täsirini 2015-nji ýylda Siriýada prezident Başar al-Assadyň goşunlarynyň gozgalaňçylara garşy alyp barýan graždan urşunda goldaw berip başlamagy bilen artdyrdy.
Orsýetiň Siriýada howa we harby deňiz bazalary bar.
Müsür 1950-1960-njy ýyllarda Moskwanyň iň ýakyn arap ýarany bolupdy. Müsüriň häzirki prezidenti Abdel-Fattah el-Sissi Orsýetiň prezidenti Wladimir Putin bilen dostlukly gatnaşyklary artdyrýar, Moskwa bilen söwda gatnaşyklaryny ösdürýär we orsýet ýaragyny satyn almaga gyzyklanma bildirýär.