Türkiýe geçen ýyl başa barmadyk harby agdarylyşyk synanyşygyndan soň Ankaranyň başlan arassalaýyşlaryny dowam edip, 2,756-den gowrak adamy terror toparlary bilen ilteşikli diýip, jemgyýetçilik edaralaryndaky işlerinden boşatdy.
24-nji dekabra “Official Gazette” neşirinde çap edilen hökümet kararyna laýyklykda, işden aýrylanlaryň arasynda 637 sany harby, 360 sany jandarm güýçleriniň agzasy, 150 sany alym we beýleki uniwersitet işgärleri bar.
Türk häkimiýetleri 2016-njy ýylyň iýul aýyndaky agdarylyşyk synanyşygyny ABŞ-da ýaşaýan ruhany Fethulla Gülenden görýärler.
Gülen ýa-da terror toparlary bilen ilteşikli diýlip, arassalaýyş başlaly bäri 110 müňden gowrak adam işinden çetleşdirildi, 50 müň çemesi adam bolsa tussag edildi.
Gülen özüniň 240 adamyň ölümine getiren agdarylyşyk synanyşygyna dahyllydygyny ret edýär.
Hukuk toparlary prezident Rejep Taýyp Erdoganyň agdarlyşyk synanyşygyny başga pikirlileri basyp ýatyrmak üçin bahana edip ulanýandygyny aýdýarlar.