Owganystanyň prezidenti Aşraf Gani we onuň garşydaşy, ýurduň baş dolandyryjysy Abdullah Abdullah 9-njy martda Kabulda geçirilen parallel dabaralarda özlerini aýry-aýrylykda prezident diýip yglan etdiler.
Kabulyň merkezinde, biri-biriniň gapdalynda ýerleşýän köşklerde geçirilen inaugurasiýa dabaralaryna ýüzlerçe myhman gatnaşdy.
Birleşen Ştatlaryň Owganystan boýunça ýörite wekili Zalmaý Halilzad we ABŞ-nyň liderligindäki halkara güýçleriň komandiri, general Skot Miller (Scott Miller) Ganiniň inaugurasiýa dabarasyna gatnaşdylar.
Ilkibada taraplar kasam ediş dabaralaryny Kabul wagty bilen sagat 13:00-a çenli yza süýşürmek barada ylalaşypdylar. Ýöne Zalmaý Halilzadyň hem gatnaşmagynda geçirilen soňky gepleşiklerde krizisi çözmek başa barmady.
Bu dawa Owganystanyň geçen ýylyň 28-nji sentýabrynda geçirilen prezident saýlawlarynyň netijelerinden gözbaş alýar.
Şu ýylyň fewralynda Owganystanyň Garaşsyz Saýlaw Komissiýasy saýlawlarda prezident Aşraf Ganiniň ikinji möhlete saýlanandygyny yglan edipdi.