Russiýanyň premýer-ministri Mihaýil Mişustin COVID-19 wirusyndan saplanandan soňra öz wezipe borçlaryna dolandy diýip, Kreml 19-njy maýda habar berdi. Bu aralykda, Russiýada koronawirusa ýoluganlaryň sany 300 müňe golaýlady.
Mişustin 30-njy aprelde özünde wirusyň ýüze çykarylandygyny mälim etdi. Ol keselhanada mahaly onlaýn ýagdaýda birnäçe hökümet maslahatyny hem geçiripdi.
Russiýada soňky 24 sagadyň dowamynda koronawirus bilen kesellän täze 9 müň 263 ýagdaý hasaba alyndy. Russiýada umumy kesellänleriň sany 299 müň 941 bolup, bu dünýä boýunça ABŞ-dan soňra ikinji uly görkezijidir.
Russiýa wirusdan 2 müň 837 adamyň ölendigini aýdýar. Emma tankytçylar asyl sanlaryň peseldilip görkezilýändigini aýdyp, bu görkezijileri sorag astyna alýarlar.
Russiýada wirusa ýolugan ýokary derejeli resmileriň arasynda Putiniň metbugat-wekili Dmitriý Peskow, medeniýet ministri Olga Lýubimowa we gurluşyk ministri Wladimir Ýakuşew hem bar.