Türkmenistanyň delegasiýasy 9-12-nji maý aralygynda Hytaýa iş saparyny amala aşyrýar.
TDH-nyň maglumatyna görä, Sian şäherine amal edilýän üç günlük saparyň dowamynda topar iki ýurduň arasyndaky alnyp barylýan hyzmatdaşlyk meselelerini maslahat eder, şeýle-de “Merkezi Aziýa – Hytaý” döwletleriniň daşary işler ministrleriniň nobatdaky mejlisine gatnaşar.
9-njy maýda Türkmenistanyň Daşary işler ministrliginde türkmen baş diplomaty Raşid Meredow Hytaýyň daşary işler ministriniň orunbasary Le Ýuýçen bilen duşuşyk geçiripdi.
Türkmen mediasynda nebit-gaz ulgamynyň ikitaraplaýyn ykdysady hyzmatdaşlygyň ileri tutulýan ugurlarynyň biri bolmagynda galýandygy bellenilýär.
Türkmen prezidentiniň golaýda geçiren hökümet mejlislerinde boýun almagyna görä, Türkmenistan Hytaýdan 8 milliard dollardan gowrak karz aldy.
Emma hytaý tarapy Aşgabatdan alýan gazynyň möçberi baradaky sanlary çap etse-de, türkmen tarapy satýan gazynyň nyrhyny, alýan girdejilerini we bergi-borç ýagdaýlaryny ýaşyryn saklaýar.
Daşary ýurt karzlaryna gurlan desgalaryň doly taslama kuwwatynda işlemezligi bilen, hökümet tankytçylary Aşgabadyň bergä batandygyny öňe sürýärler.