Russiýanyň ýakyn ýarany Gazagystan, rus güýçleri tarapyndan okupirlenen, Ukrainanyň territoriýalarynda Moskwanyň “referendum” atlandyryp geçirýän çäresiniň netijelerini ykrar etmejekdigini mälim etdi.
Gazagystanyň daşary işler ministrliginiň metbugat wekili Aibek Smadiýarowyň 26-njy sentýabrdaky sözlerine görä, Astana, rus goşunlary tarapyndan bölekleýin eýelenen, Ukrainanyň Donetsk, Luhansk, Herson we Zaprižýa regionlarynda geçirilýän referenduma “ýurtlaryň territorial bütewiligi prinsipinden” çemeleşýär.
Mundan öň, iýunda Russiýanyň Sankt-Peterburg şäherinde geçirilen ykdysady forumyň dowamynda, prezident Wladimir Putiniň gabat garşysynda oturan gazak prezidenti Kasym Žomart-Tokaýew Moskwanyň Ukrainanyň Donetsk we Luhansk regionlaryny degişlilikde Luhansk milli döwleti we Donetsk milli döwleti diýip ykrar eden sebitlerini “kwazi-döwletler” atlandyrdy we Gazagystanyň olary ykrar etmejekdigini mälim etdi.