Gyrgyzystanyň günortasyndaky Jalal-Abad regionynda zenanlaryň bir topary ýurtda gadagan edilen yslamçy topara agza bolmakda aýyplanyp, tussag edildi.
Gyrgyzystanyň Içeri işler ministrliginiň 30-njy sentýabrda beren maglumatyna görä, 20 we 25 ýaş aralygyndaky ýedi zenan Nuken etrabynda geçirilen ýörite operasiýalar döwründe tussag edilipdir.
Gyrgyz polisiýasy deliller gürrüňi gidýän toparyň “Hizb ut-Tahrir” guramasyna ýerli ýaşaýjylaryň arasyndan täze agzalary işe çekmek ýaly işlere işjeň gatnaşandygyny görkezýär diýdi.
Düýbi Londanda ýerleşýän “Hizb ut-Tahrir” guramasy ähli musulman ýurtlarynyň birleşip, bir Yslam halyfatynyň astynda jemlenmegini maksat edinýär.
Gyrgyzystanyň hökümeti bu guramanyň agzalaryny we tarapdarlaryny “ekstremist” diýip atlandyryp, ony gadagan edipdi.