Türkmenistan

Ahal welaýatyndaky habarçymyz we çeşmeler sebitiň zir-zibil çeleklerini dörüp, iýer ýaly zat gözleýän we bu ýerde biri-biri bilen ýakalaşýan ýaşulularyň köpelýändigini habar berýärler. Bu habar resmi maglumatlara, ýurduň “durmuş üpjünçiliginiň täzeçe çemeleşmeleri", häzirki zaman pensiýa ulgamy hasaplanylýan ulgamy barada aýdylýanlara ters gelýär.

Dürli çeşmelerden gelip goşan maglumatlara görä, şu günler zir-zibil atylýan çelekleriň her birine ýaşuly adamlar, pensiýa ýaşyndaky raýatlar ‘berk gözegçilik edýär’.

“Olar, özlerinden başga hiç kim el degirmez ýaly, zibil çelekleriniň ýanynda nobatçylyk çekýärler. Mundan öň bu hili ýerlerde ýaş oglan-gyzlar köp görlerdi. Olar plastik gaplary, Kardon kagyzlary çöpläp, eklenç ederdiler. Soň bu çelekleriň ýanynda ýany çagaly aýal maşgalalar köpelipdi” diýip, Azatlyk bilen anonimlik şertinde gürleşen ýaşaýjy aýtdy.

Zibil çelekleriniň daşynda gartaşan adamlar köpelýär

Habarçylarymyz aç-hor çagalaryň, mätäçlik çekýän raýatlaryň zibil çeleklerinden iýmäge ýa satmaga ýarajak zat gözlemeginiň barha kän göze ilýändigini ençeme ýyl bäri habar berýärler. Ýöne mundan öň, bazarlarda we beýleki köpçülik ýerlerinde dileg edýän garrylary nazara almasaň, ýaşaýjylaryň aýtmagyna görä, pensiýa ýaşyndaky adamlar beýle ýagdaýda o diýen kän ‘göze ilmeýärdi’.

Degişli maglumat

Ýaşuly nesliň wekilleri özleriniň pensiýa haklarynyň ujypsyz bolandygyny aýdýar

“Indi, häzirki günde, pensiýa ýaşyndaky adamlar birden zibil çelekleriniň daşyna üýşüp, olary paýlaşmaga başlandyklaryny görse bolýar. Ýaşy bir çene baran, 60-dan geçen adamlaryň biri-biri bilen ýakalaşýandygyny görüp, olary aralamaga barýan adamlar hem haýran galýarlar” diýip, şeýle ýagdaýa şaýat bolan çeşme aýtdy.

Azatlygyň habarçysy ýakalaşýan ýaşululary aralandygyny aýdan ýaşaýjy bilen hem söhbetdeş boldy. Onuň sözlerine görä, zibil çeleklerini ‘garawullaýan’ ýaşlylar bu ýeriň golaýynda, çelege taşlanman, mal saklaýanlar alar ýaly edilip goýlan gawun, garpyz paçaklary üstünde dawalaşyp, ýakalaşmaga çenli baryp ýetýärler.

“Ilki men olaryň mal-garasy badyr öýtdüm. Aralap bolup, ‘näme, malyň barmy?’ diýip sorasam, ‘ýok, malym ýok, häzir biziň öz ýagdaýymyz malyňkydan üýtgeşik däl, men bu paçaklary gyryp, suwuny içýärin, käte iýer ýaly ýeri bolsa, iýýärin, biziň pensiýamyz gaty az’ diýdi. ‘Şeýdip gün görmesek, bizi garrylar öýi hem kabul edenok’ diýip zeýrendi. Gaty gynandym” diýip, söhbetdeşimiz aralan ýaşulularynyň adatça durýan ýerlerini salgy berdi.

Pensioner ýaşyly gününiň paçaga galandygyny aýdýar

Habarçymyz bu ýere baryp, salgysy berlen ýaşuly bilen hem söhbetdeş boldy. Ol aýdylýan zatlary tassyklap, şeýle diýdi:

“Ýakalaşan sakgaldaşym paçak çöpläp, mal-garasy bolan adamlara satýar. Men bolsam, özüm we aýalym, agtygym bilen bile, ‘paçak suwuna çörek batyryp işsek bolýar’ diýip çöpleýärin. Şol sebäpden zibil çeleklerini garawullamaly bolýaryn, käte ýakalaşmalam bolýar. Geçen gezek ýoldaşym ýakalaşanda, elini döwdürdi, keselhana baryp, gipsletmäge puly bolmansoň, ol häzir öýünde ýatyr. Men onuň paýyny hem eltip bermeli bolýaryn” diýip, pensioner ýaşuly Azatlygyň habarçysyna aýtdy.

Bu ýagdaýlary daşyndan synlan bir ýaşulynyň habarçymyz bilen söhbetdeşlikde aýtmagyna görä, döwlet ýolbaşçylary ‘häzir, halkyň başdan geçirýän kyn döwründe itşynaslara, atşynaslara uly çykdajy edip, pensionerleriň pensiýalaryny ýylda 10% göterim köpeltmegi hem bes etdi’.

“Pensionerler ‘biziň pensiýa pulumyzy kesip, häzir uly mukdarda pul sarp edip, golf meýdançasyny gurýarlar’ diýip gürrüň edýärler. Biziň pulumyzy golf meýdançasyna, it we ata heýkellerine harçlaman, her welaýatyň her etrabynda Garrylar öýüni gursa, ol ýere-de mugt, para-peşgeşsiz girip, arkaýyn ýatyp-turup, naharlanyp, ýuwnup-ardynyp, syrkawlasaň mugt bejergi alyp biler ýaly, halk bähbitli iş etse, özümem şol ýere giderdim” diýip, anonimlik şertinde gürleşen ýaşuly aýtdy.

Degişli maglumat

Maýyplaryň alýan kömek pullary esasy zerurlyklaryna ýetmeýär - çeşmeler

Ol häzir ogly, gelni, agtyklary bilen bile ýaşaýandygyny, ýöne hojalyga salýan agramyny duýýandygyny hem sözüne goşdy.

“Meni oglum ekläp-saklajak bolýar. Emma men duýýaryn, hojalyga salýan agramym gün-günden artýar. Gelnim birde çaý-çörek uzatsa, birde uzatmaýar. Meniň öz öýümde iýjek çöregim hem käte minnetli bolýar. Eger-de pensiýalar, häzirki bazar nyrhlaryny öwrenip, talaba laýyk berilse, onda bizem öz iýjek zatlarymyzy arkaýyn alyp, minnetli aş içmezdik.”

Ýaşulular "Garrylar öýleriniň" köpeldilmegini isleýär

Azatlygyň habarçysynyň aýry-aýrylykda gürleşen birnäçesiniň tassyklamagyna görä, häzir “Garrylar öýi açylsa, kabul etseler hökman barardym” diýýän ýaşuly barha köpelýär.

Aşgabatly synçy türkmen pensionerleriniň häzirki ýagdaýynyň ilkinji prezident Saparmyrat Nyýazowyň pensiýalary kesende ýa düýpli azaldanda düşen ýagdaýyny ýatladýandygyny, Gurbanguly Berdimuhamedow 2007-nji ýylda prezident bolanyndan soň, ozaly Türkmenbaşynyň ‘garrylary ogul-gyzy eklesin’ diýen syýasatyna garşy durandygyny belledi.

“Häzirki prezident hem kimiň ogly, gyzy bolsa, şol eklesin syýasatyny alyp barýana meňzeýär. Emma ogul-gyzlaryň alýan aýlyklary özlerine ýetmeýär. Hojalykda haçan et iýenimiz ýadymyzdan çykdy” diýip, zibil çelekleriniň ýanyndaky ýagdaýy daşyndan synlaýan goja aýtdy.

Diňe pensionerler däl, býujet edaralarynyň işgärleri hem eklenjiň barha kynlaşýandygyny öňe sürýärler. Aýdylmagyna görä, gara bazar nyrhynda 100, 250 dollardan geçmeýän aýlyklar üç-dört adamly hojalyk üçin gaty az bolýar.

"Ýurtda harytlar we hyzmatlar gymmatlaýar, hökümet ilat üçin öň girizen sosial ýeňilliklerine hem ýatyrdy, şu ýyl, öňki ýyllardan tapawutlylykda, aýlyklar we pensiýalar hem 10% ýokarlandyrylmady" diýip, ýerli synçy aýty.

Azatlyk Türkmenistanly pensionerleriň sany barada anyk maglumat tapyp bilmedi. Resmi maglumatlarda minimal pensiýanyň 500 manatdan sähel gowrakdygy aýdylýar, bu 142 dollara, gara bazar nyrhy bilen 25 dollara barabar. Türkmen pensionerleriniň sözlerine görä, pensiýasy 300 manada ýetmeýän adamlar hem bar.

Resmi maglumatlarda hemme zat gowy

Resmi maglumata görä, Türkmenistan, doly hukukly agzasy hökmünde, Halkara zähmet guramasynyň binýatlyk konwensiýalarynyň ählisine goşuldy.

Şeýle-de, Zähmet we ilaty durmuş taýdan goramak ministrliginiň web sahypasynda ýurtda Gartaşan adamlara we maýyplygy bolan adamlara durmuş taýdan hyzmat edýän edaralaryň, şeýle-de Pensiýa gaznasynyň hereket edýändigi aýdylýar. Emma muňa garamazdan, Azatlyk degişli edaralara hat ýazyp, telefon edip, hiç bir düşündiriş alyp bilmeýär.

Türkmen emeldarlary garaşsyz metbugatyň sowallaryna jogap bermegi, çap edilýän habarlary tassyklamagy ýa-da inkär etmegi zerur hasaplamaýar.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

ABŞ-nyň Döwlet sekretarynyň jemgyýetçilik diplomatiýasy boýunça orunbasary Sara Rojers Türkmenistana eden saparynyň çäklerinde söz azatlygy, açyk maglumat giňişligi we internet elýeterliligi barada çykyş edip, bu ugurlary diňe bir ynsanperwer gymmatlyk däl, eýsem ykdysady ösüşiň we innowasiýanyň esasy şertleriniň biri hökmünde häsiýetlendirdi.

Rojers 8-9-njy iýunda Türkmenistanda boldy we 9-njy iýunda Aşgabatda žurnalistler üçin geçirilen brifinge gatnaşdy. Bu onuň Günorta we Merkezi Aziýa ýurtlaryny, şol sanda Hindistany, Nepaly, we Özbegistany öz içine alan sebitleýin saparynyň bir bölegi boldy.

Brifingde Rojers saparynyň dowamynda üç esasy ugra – söwda diplomatiýasyna, medeni mirasy gorap saklamaga, şeýle hem sanly azatlyk we innowasiýa arkaly arabaglanyşygy güýçlendirmäge üns berlendigini aýtdy.

“Dört nokadyň ählisinde hem her bir söhbetdeşligime we her bir gatnaşygymyň mazmunyna üç ileri tutulýan ugur esas boldy. Bu ileri tutulýan ugurlar söwda diplomatiýasy, medeni mirasy gorap saklamak, şeýle hem sanly azatlyk we innowasiýa arkaly arabaglanyşygy güýçlendirmek boldy” diýip, Rojers aýtdy.

Brifingiň dowamynda amerikan resmisi hukuk toparlary tarapyndan media we internet erkinligini berk çäklendirmekde tankytlanýan Türkmenistanyň metbugat we maglumat giňişligi barada hem durup geçdi.

Rojers Aşgabatdaky Amerikan merkezinden göni çykyş edýändigini aýdyp, bu merkezi “tutuş Türkmenistan boýunça mugt, çäklendirilmedik jemgyýetçilik internet elýeterliligini üpjün edýän ýeke-täk ýer” diýip häsiýetlendirdi.

“Bu ýerde, Aşgabadyň Amerikan merkezinde men ýaşlaryň öz pikirlerini ynamly we berk ynanç bilen ara alyp maslahatlaşýandygyny synlamak hormatyna eýe boldum. Bu merkez tutuş Türkmenistan boýunça mugt, çäklendirilmedik jemgyýetçilik internet elýeterliligini üpjün edýän ýeke-täk ýerdir” diýip, Rojers aýtdy.

Ol brifingiň sorag-jogap bölüminde hem Aşgabatdaky Amerikan merkezine gaýdyp gelip, şol ýerde türkmen raýatlarynyň senzurasyz internete mugt elýeterlilik alýandygyny aýtdy.

“Men häzir Aşgabadyň Amerikan merkezinden göni ýaýlyma çykýaryn. Bu tutuş Türkmenistan boýunça türkmen raýatlarynyň senzurasyz internete mugt jemgyýetçilik elýeterliligini alyp bilýän ýeke-täk ýeridir. Olar muny Amerikanyň kömegi bilen alýarlar” diýip, Rojers aýtdy.

Rojersiň sözlerine görä, Türkmenistanyň hökümeti Amerikan merkeziniň bu mümkinçiligi hödürleýändiginden habarly we muny goldaýar.

“Hökümet biziň muny hödürleýändigimizi bilýär we hökümet muny goldaýar. Munuň sebäpleriniň biri hem biziň bu Amerikan merkezinden Birleşen Ştatlar bilen Türkmenistanyň paýlaşýan ikitaraplaýyn maksatlaryny öňe süren köp sanly maksatnamalarymyzy giňeldenligimizdir” diýip, Rojers aýtdy.

Hukuk toparlary Türkmenistanyň maglumat giňişliginiň berk döwlet gözegçiligi astynda galýandygyny, garaşsyz media serişdeleriniň ýurduň içinde erkin iş alyp baryp bilmeýändigini aýdýarlar. “Serhetsiz reportýorlar” (RSF) guramasynyň 2026-njy ýyldaky Dünýä metbugat azatlygy indeksinde Türkmenistan 180 ýurduň arasynda 173-nji ýerde görkezildi.

RSF Türkmenistanda media giňişliginiň berk gözegçilik astyndadygyny, ýurduň gazetleriniň, radio-telewideniýesiniň we internetiniň hökümetiň berk gözegçiliginde galýandygyny aýdýar. Human Rights Watch guramasy hem soňky hasabatynda Türkmenistanda garaşsyz žurnalistikanyň gadagan edilýändigini we internet elýeterliliginiň yzygiderli çäklendirilýändigini belledi.

Degişli maglumat

Türkmenistan Metbugat azatlygy hasabatynda ýene iň ýaramaz ýagdaýdaky ýurtlaryň arasynda galdy

Rojers brifingde Özbegistanda we Türkmenistanda media wekilleri hem-de kontent döredijiler bilen duşuşandygyny aýtdy. Onuň sözlerine görä, bu duşuşyklar garaşsyz sesleriň ösmegine mümkinçilik berýän gurallara we azatlyklara gyzyklanmanyň bardygyny görkezýär.

“Men Özbegistanda-da, Türkmenistanda-da media wekilleri we kontent döredijiler bilen duşuşdym, olaryň döredijiligi, batyrlygy we garaşsyz sesleriň ösmegine mümkinçilik berýän gurallara hem-de azatlyklara bolan islegi mende uly täsir galdyrdy” diýip, Rojers aýtdy.

Ol açyk maglumat giňişliginiň ykdysady ösüş bilen göni baglanyşyklydygyny aýtdy.

“Katmandudan Aşgabada çenli men yzygiderli bir habary ýetirdim. Açyk maglumat ekoulgamlary we söz azatlygy diňe ynsanperwer gymmatlyklar däl, olar ykdysady ösüşiň we innowasiýanyň esasy daýançlarydyr” diýip, Rojers aýtdy.

Senzura baradaky soraga jogap berende, amerikan resmisi özüniň ABŞ Konstitusiýasynyň Birinji düzedişi garaýşyndan, ýagny raýatlaryň söz we metbugat azatlygyny hökümetiň islendik görnüşdäki çäklendirmelerinden goraýan kanuny ýörelgeden ugur alýandygyny aýtdy. Ol senzura düşünjesini hökümetiň ýa-da merkezleşdirilen güýjüň sözi basyp ýatyrmagy ýa-da jezalandyrmagy bilen baglanyşdyrdy.

“Men Amerikanyň Birinji düzediş nukdaýnazaryndan ugur alýaryn we senzura düşünjesini kesgitlemegiň iň gowy usuly merkezileşdirilen güýç, aýratyn-da hökümet, sözi basyp ýatyranda ýa-da jezalandyranda ýüze çykýar diýip pikir edýärin. Senzura, esasan-da, hökümet sözi onuň beýan edýän garaýşy sebäpli basyp ýatyranda ýa-da jezalandyranda has ýiti bolýar” diýip, Rojers aýtdy.

Ol haýsydyr bir ýurda senzura gerek diýip pikir etmeýändigini aýtdy.

“Men haýsydyr bir ýurda senzura gerek diýip pikir etmeýärin. Aslynda, men biziň hemmämize senzurasuz has gowy boljakdygyna ynanýaryn” diýip, Rojers aýtdy.

Şeýle-de ol internetde belli bir düzgünleriň bolmagynyň mümkindigini, ýöne munuň pikirleri basyp ýatyrmak ýa-da jezalandyrmak görnüşinde bolmaly däldigini belledi. Rojersiň pikiriçe, internetiň daşyndaky dünýäde bar bolan goraglar onlaýn giňişlikde hem bolmaly, ýöne olar howply pikirlerden däl-de, howply hereketlerden goramaga gönükdirilmelidir.

“Meniň pikirimçe, senzura – ýok. Emma şol bir wagtda, internetiň daşynda bar bolan goraglar internetde hem bolmaly. Bular howply pikirlerden gorag däl-de, howply we jemgyýete garşy hereketlerden goragdyr” diýip, ol aýtdy.

Brifingde ‘ABŞ-nyň beýleki ýurtlarda söz azatlygyny, pikir beýan etmek azatlygyny we metbugat azatlygyny öňe sürmegini indi ileri tutmaýan ýaly görünýändigi’ baradaky sorag hem berildi. Rojers bu çaklama bilen ylalaşmaýandygyny aýdyp, Birleşen Ştatlaryň daşary ýurtlarda söz azatlygyny işjeň öňe sürýändigini aýtdy.

“Men biziň beýleki ýurtlarda söz azatlygyny örän işjeň öňe sürýändigimize ynanýaryn” diýip, Rojers aýtdy.

Ol ABŞ-nyň Merkezi Aziýa ýurtlary bilen gatnaşyklarda hem bu gymmatlyklary öňe sürüp biljekdigini, şol bir wagtda özara bähbitli hyzmatdaşlygyň hem dowam etdirilýändigini belledi.

“‘Amerika Ilkinji’ hiç wagt ‘Amerika ýeke’ diýmegi aňlatmady. Merkezi Aziýanyň käbir ýurtlarynda Amerikadaky ýaly söz azatlygy taryhy we däbi doly ýok diýip, men bu ýerde şol baýdagy göterip ýa-da şol gymmatlyklary öňe sürüp bilmerin diýen zat ýok” diýip, Rojers aýtdy.

Degişli maglumat

ABŞ Türkmenistanyň Trans-Hazar arkaly gaz eksport ugruny üýtgetmek islegini goldady

"... SSSR-iň we KGB-niň basgysy astynda"

Amerikan resmisi Merkezi Aziýa ýurtlarynyň syýasy we taryhy şertleriniň ABŞ-dan tapawutlanýandygyny hem belledi. Ol bu ýurtlaryň Sowet Soýuzynyň düzüminde bolandygyny we şol mirasyň täsiriniň henizem duýulýandygyny aýtdy.

“Bu Merkezi Aziýa ýurtlary 1990-njy ýyllara çenli, ýagny biziň ömrümiziň dowamynda, SSSR-iň we KGB-niň basgysy astynda ýaşady. Şonuň üçin olar henizem kemala gelýär” diýip, Rojers aýtdy.

Şeýle-de ol Türkmenistanda açyklyga ymtylyş görýändigini aýtdy.

“Emma meniň bu ýerde, şol sanda örän ýokary derejeli hökümet resmileri bilen geçiren duşuşyklarymyň esasynda umytly garaýan zadym, bu ýurduň açyklygy maksat hökmünde görýändigidir” diýip, Rojers aýtdy.

Rojers ýaş türkmen telekeçileri we talyplary bilen duşuşyklary barada hem gürrüň berdi. Onuň sözlerine görä, olar amerikan tehnologiýasyna gyzyklanma bildirýärler we amerikan stilindäki çekişmelere gatnaşýarlar.

“Men ýaş türkmen telekeçileri bilen, şeýle hem Özbegistanda telekeçiler we talyplar bilen duşuşandygymy aýdyp bilerin. Olar amerikan tehnologiýasy bilen uly höwes bilen iş salyşýarlar”

“Men olaryň amerikan stilindäki çekişmä gatnaşýandygyny gördüm. Men olaryň iPhone we Marshall meýilnamasy ýaly zatlara salgylanýandygyny gördüm, amerikan taryhy barada jedelleşýändigini gördüm” diýip, ol belledi.

Rojers bu synlaryny söz azatlygynyň jemgyýetçilik derejesindäki mümkinçilikleri bilen baglanyşdyrdy.

“Şonuň üçin Amerikada söz azatlygynyň şeýle gowy işlemegine esas döredýän duýgular bu ýerde hem bar diýip pikir edýärin” diýip, Rojers sözüne goşdy.

Brifingde internetiň öçürilmegi we awtoritar döwletlerde sanly giňişligiň çäklendirilmegi barada hem sorag berildi. Rojers söz azatlygynyň öz-özüňi dolandyrmak üçin esasy şertdigini aýtdy.

“Söz azatlygy bolmasa, öz-özüňi dolandyrmak bolup bilmez. Demokratiýanyň işleýşi şundan ybarat: siz islendik pikiri jemgyýetçilik meýdanyna getirip, mysal üçin, naýza alyp ýa-da hökümeti agdarmaga synanyşmagyň ýerine, ildeşleriňizi ynandyrmaga çalşyp bilýärsiňiz” diýip, Rojers aýtdy.

Rojers beýleki ýurtlary raýatlaryna söz azatlygyny bermäge çagyrýandygyny hem aýtdy.

“Birinji düzediş mirasyndan ugur alyp, ýurtlara öz raýatlaryna söz azatlygyny bermäge çagyrardym. Şeýle edilende, bu demokratiýa üçin has gowudyr diýip pikir edýärin” diýip, ol aýtdy.

Emeli aň boýunça hyzmatdaşlyk

Brifingde Türkmenistan bilen emeli aň we maglumat merkezleri boýunça hyzmatdaşlyk mümkinçilikleri hem gozgalyp geçildi. Hökümetçi maglumatlary çap edýän onlaýn türkmen neşiriniň wekili Türkmenistanyň emeli aňy ösdürmegi meýilleşdirýändigini we maglumat merkezleriniň gurluşygy boýunça daşary ýurt kompaniýalary bilen gepleşikleriň alnyp barylýandygyny aýtdy.

Rojers anyk kompaniýalaryň adyndan çykyş edip bilmejekdigini aýtdy, ýöne amerikan tehnologiýa kompaniýalarynyň bu ugurda hyzmatdaşlyga gyzyklanma bildirýändigini belledi.

Ol Merkezi Aziýadaky duşuşyklarynda emeli aň we maglumat merkezleri baradaky meseleleriň yzygiderli gozgalandygyny aýtdy.

“Merkezi Aziýanyň ähli ýerlerinde emeli aň we maglumat merkezleri meniň geçiren tas ähli söhbetdeşliklerimde, şol sanda her ýurtda ýokary derejeli ministrler bilen söhbetdeşliklerde hem gozgalan mesele boldy” diýip, Rojers aýtdy.

Rojers Türkmenistanyň tehnologiýa gyzyklanma bildirýändigini ‘ruhlandyryjy’ diýip atlandyrdy.

“Türkmenistanyň bu tehnologiýa gyzyklanma bildirýändigi meni ruhlandyrýar we bu meni geň galdyrmaýar, sebäbi meniň pikirimçe, bu hökümet tehnologiýa we abadançylyk isleýär” diýip, ol aýtdy.

“Umuman aýdylanda, bir ýurt tehnologiýa we abadançylyk islese, amerikan kompaniýalary ony bermäge taýýar durýar” diýip, Rojers sözüniň üstüni ýetirdi.

Rojers Türkmenistana saparynyň dowamynda Halkara atçylyk sport toplumyna baryp gördi hem-de Türkmenistanyň Daşary işler ministri Raşid Meredow we Bilim ministrliginiň ýolbaşçylary bilen resmi duşuşyklar geçirdi

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.