Türkmenistan

11-nji iýunda FIFA-nyň futbol boýunça dünýä çempionaty (2026 FIFA World Cup) başlanýar. ABŞ-nyň, Kanadanyň we Meksikanyň stadionlarynda bir aýdan gowrak wagtlap dowam etjek bu oýunlara dünýäniň dürli künjeklerinde millionlarça tomaşaçy bilen bir hatarda türkmen tomaşaçylary hem sabyrsyzlyk bilen garaşýarlar.

Türkmen janköýerleri esasan-da, goňşy Özbegistanyň milli komandasynyň dünýä çempionatyna gatnaşmak mümkinçiligine eýe bolmagyny buýsançly kabul edipdir. Azatlyk Radiosynyň Türkmenistandaky habarçylary bu uly halkara sport çäresi barada türkmenistanlylaryň pikirini sorady.

- "Özbek futbol komandasyndan umytlar gaty uly, iň bolmanda 3-nji orny alarlar diýip, garaşýarys" diýip, aşgabatly janköýer aýdýar.

- "Türkmenistanyň futbol janköýerleri Özbegistanyň komandasyna 'bolet' etjekdigini aýdýarlar. Adamlar olaryň utuş gazanmagyna garaşýarlar. Internet ulgamynda türkmen janköýerleri şeýle lozunglary aýdýarlar: 'Özbek doganlarymyz Türkmenistan siz bilen!' diýýärler" diýip, başga bir türkmenistanly aýtdy.

- "Özbegistanyň futbol komandasynyň dünýä çempionatyna çykmagy haýran galdyrdy. Ýurtdaky etniki özbekler gaty begendiler. Ýaryşy yzarlajakdygyny aýdýarlar", diyip ýene bir futbol janköýeri gürrüň berip, sözüni şeýle dowam etdirdi: Başga komandalara janköýerlik etjekler hem kän, ýöne Özbegistanyň komandasynyň gatnaşýanyny bilemde öz ýurdumuň komandasy gatnaşýan ýaly boldum" .

Degişli maglumat

Türkmen futbolçylary rusça ýüzlenip, janköýerlerden goldaw sorady

Ýene bir türkmenistanly janköýer özüniň we öz tanyşlarynyň çempionata Merkezi Aziýanyň futbolçylarynyň gatnaşmagyny "öz futbolçylary gatnaşýan ýaly" kabul edendigini aýtdy: "Özbegistanyň şu aýda geçýän dünýä çempionatyna çykmagy Türkmenistanyň futbol janköýerleri we umuman halky üçin begençli habar boldy. Mundan bir ýyl töweregi ozal özbek milli komandasy bu ýaryşa çykmagy başaran wagtynda hem türkmenistanlylar hamana öz komandasy dünýä çempionatyna çykmagy gazanan ýaly begendiler".

Merkezi Aziýa sebitinden diňe Özbegistanyň topary ýaryşyň final tapgyryna çykmagy başardy.

2026-njy ýyldaky Dünýä çempionatynyň saýlama ýaryşynda türkmen komandasy Aziýa saýlama oýunlarynyň (AFC) ikinji tapgyrynda "E" toparynda Eýran, Özbegistan we Gonkong bilen bilelikde çykyş edipdi. Mergen Orazowyň tälimçiligindäki türkmen futbolçylary toparda ilkinji iki orundan birini eýeläp bilmediler, bu bolsa olara indiki tapgyra çykarmaga mümkinçilik bererdi.

Türkmenistanyň milli futbol topary hiç haçan futbol boýunça Dünýä çempionatynyň finalyna gatnaşmandy. Ol FIFA reýtinginde 141-nji orunda durýar.

Azatlyk bilen söhbetdeş bolan Türkmenistanly janköýerleriň biri bu barada öz pikirini şeýle beýan etdi: "Dünýä çempionatyna çykmagyň özi aňsat iş däl, mysal üçin türkmen futbol komandasy häzirki ýagdaýynda 21-nji asyryň dowamynda dünýä çempionatyna gatnaşyp biljekmi diýen sorag döreýär".

Degişli maglumat

Bökdençlikleri böwsen çempionlar: Merkezi Aziýanyň iň hyjuwlandyryjy sport şahsyýetleri

Futbol boýunça häzirki Dünýä çempionaty 23-nji gezek geçirilýär. 11-nji iýun we 19-njy iýul aralygynda üç ýurduň Kanadanyň, Meksikanyň we ABŞ-nyň jemi 16 stadionynda geçiriljek oýunlara 48 sany komanda gatnaşar. Çempionatyň birinji oýny 12-nji iýunda Torontonyň stadionynda Kanada we Bosniýa Gersegowina toparlarynyň duşuşygy bilen başlanar.

Futbol boýunça halkara federasiýasy FIFA-nyň websaýtynda görkezilen oýun tertibine görä, Özbegistanyň futbolçylary 17-nji iýunda Kolumbiýa, 23-nji iýunda Portugaliýa we 27-nji iýunda Kongo DR bilen ýaryşar.

Degişli maglumat

Dünýä çempionatynda aýallary, geýleri kemsiden janköýerleriň komandalaryna jerime salyndy

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.

8-nji iýunda Stambuldan Aşgabada ýolagçy getiren türkmen uçarynda Türkiýeden çykmaly edilen 100-e golaý migrant ýurduna dolandy diýip, Azatlygyň habarçysy habar berýär.

Azatlyk 2023-nji, 2024-nji ýyllarda Türkiýeden köpçülikleýin deportasiýa edilen türkmenistanlylar hakynda birnäçe gezek habar berdi, ýöne şondan soň bir günde beýle köp adamyň deport edilendigi mälim bolmandy.

Birnäçe çeşmäniň tassyklamagyna görä, deport edilen raýatlar Aşgabadyň howa menzilinde MHM işgärleri tarapyndan ‘berk soraga çekilip, elekden geçirildi’.

Uçardan düşen ýolagçylaryň ýigirmiden gowragy telekeçiler we daşary ýurtlara iş saparyna ugradylan MHM işgärleri bolup, olar dessine geçirildi diýip, howa menzilindäki ynamdar çeşme habar berdi.

Deportasiýa edilenler MHM tarapyndan 'berk soraga çekildi'

Türkiýeden deportasiýa karary bilen çykarylan adamlar 95 töweregi bolup, olar ýekelikde çagyrylyp, bäş sany otagda, birnäçe howpsuzlyk ofiseriniň gatnaşmagynda sorag edildi.

“Deport edilenleri ýeke-ýekeden çagyryp, ýanyndaky telefonyny barladylar, olar MHM işgärleriniň beren ähli soragyna jogap bermeli boldular” diýip, çeşme soragyň ençeme sagada çekendigini, ýolagçylaryň köp garaşmaly bolandygyny hem sözüne goşdy.

Degişli maglumat

Türkiýeden Türkmenistana deport edilýän raýatlar “köpelýär”

“Telefonlary ellerinden alnan adamlar telefonyň gorag koduny aýtmaga mejbur edildi, onuň içindäki maglumatlar MHM işgärleri, IT hünärmenleri tarapyndan öwrenildi. ‘Türkiýede haýsy sosial torlara girip, kimler bilen gürleşdiň?; YouTube kanalynda nämelere laýk basdyň?’ diýen ýaly soraglar berildi, IP adresleri, elektron poçtalary gözden geçirildi” diýip, çeşme aýtdy.

“Şübheli, oppozisiýa diýilýän, ýurdy terk eden, öň döwlet işlerinde işlän we köp ýyl bäri türkmen hökümetini tankytlaýan adamlar bilen aragatnaşyk gurmakda güman edilen raýatlar öýlerine goýberilmän, MHM-niň etrap bölümine äkidildi” diýip, çeşme saklanan adamlaryň anyk sanyny bilmeýändigini hem sözüne goşdy.

Şol bir wagtda, soraglardan geçen raýatlaryň, MHM-niň ‘şübheli raýatlar’ sanawyna goşulyp, bellige alnandygy aýdylýar.

Resmi taýdan tassykladyp ýa inkär etdirip bolmaýan maglumatlara görä, ýörite gulluklar soňky bir ýylda ‘gara sanaw’ meselesini gaýtadan berkidýärler.

Türkmenistanlylar 'iň kösençli migrantlar' hasaplanýar

Türkiýe türkmenistanlylaryň iň kän barýan we bikanun ýagdaýda ýaşaýan ýurtlarynyň biri bolup, bu ýurtdaky şertler tankydy pikirini aýtmaga synanýan ildeşlerimiziň köpelmegine getirýär diýip, ýerli synçy aýtdy.

“Türkmen hökümetiniň diplomatik ýollar arkaly ýüz tutmagy bilen, daşary ýurtlarda ýaşaýan raýatlarymyz Türkiýeden we beýleki ýurtlardan yzygiderli ýagdaýda yzyna ugradylýar. Olar soň bäş ýyl şol ýurtlara girmesiz edilýär” diýip, synçy aýtdy.

Anonimlik şertinde gürleşen zähmet migrantlarynyň aýtmaklaryna görä, birnäçe aýlyk wiza bilen gelen türkmenistanlylar soň köplenç kyn ýagdaýlara düşýär.

“Türkmen raýatlary Russiýa we Türkiýe ýaly ýurtlara üç aýlyk wiza bilen barýar, şondan uzak möhletli wiza berilmeýär. Üç aýdan soň olar, jeňňel adamsy ýaly, gorkuda we gaçgak ýaşap, işlemeli we maşgala eklemeli bolýar” diýip, migrant aýtdy.

Azatlygyň habarçylary geçen ýyl Polşa gelen türkmen migrantlarynyň Germaniýa geçip, bosgunlyk almaga çalyşýandyklaryny habar berdiler. Golaýda bolsa, pasport möhletleriniň dolmagy sebäpli, Germaniýada işleýän türkmenistanlylaryň kyn ýagdaýa düşendigi mälim boldy.

Degişli maglumat

Polşadaky türkmenleriň arasynda Germaniýada bosgunlyk, gaçybatalga almaga synanyşýanlar “köpelýär”

Söhbetdeşlerimiziň tassyklamagyna görä, sebitdäki ýurtlaryň zähmet migrantlarynyň arasynda daşary ýurtlarda kanuny ýagdaýda işlemekde we yzyna pul ugratmakda türkmenistanlylar ýaly uly we emeli kynçylyk çekýän adam ýok.

"Ýagdaýymyzdan peýdalanyp, bizi aldaýarlar"

“Bikanun ýagdaýda ýaşamagymyz sebäpli, baran ýurtlarymyzyň işewürleri bizi işledip, hakymyzy tölemän aldaýarlar, polisiýa tabşyryp, pulumyzy sorap bilmez ýaly edýärler. Wagtlaýyn ýazga goýjak diýlip aldanýan, yzyna dolanyp, serhetden geçmeli bolanda ýazgy edilmändigini bilip, bäş ýyllyk gadagançylyga düşýän türkmen hem az däl” diýip, zähmet migranty gürrüň berdi.

Türkmenistan daşary ýurtlara zähmet migrasiýasyna çykan, dürli ýurtlarda kanuny ýa bikanun ýagdaýda işleýän raýatlary, şol sanda deport edilen adamlar, barha güýçlenýändigi aýdylýan migrasiýa meýilleri baradaky resmi maglumatlary çap etmeýär.

Azatlyk ýurduň Daşary işler, Içeri işler, Milli howpsuzlyk ministrliklerinden, Döwlet migrasiýa gullugyndan resmi düşündiriş alyp bilmeýär.

Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.

Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.