Azerbaýjanyň garaşsyz täzelikler agentliginiň Bakudaky edarasynda reýd geçirildi

Azerbaýjanyň salgyt resmileri ýurduň “Turan” täzelikler agentliginiň Bakudaky edarasynda reýd geçirdiler.

Salgyt departamentiniň salgyt bilen bagly jenaýatçylyklaryň öňüni almak boýunça gullugynyň wekilleri 16-njy awgustda täzelikler agentliginiň edara jaýyna baryp, dokumentleri ele saldylar.

Şeýle-de olar garaşsyz täzelikler agentligiň işgärleriniň şahsy zatlaryny barladylar, emma bu barlaglary wideo almagy gadagan etdiler.

Resmiler “Turan” agentligi babatynda salgytdan gaçmak aýyplamasy esasyndaky işi 7-nji awgustda başladylar. Derňewçiler agentligiň 2014-2016-njy ýyllaryň aralygynda 37 müň manat (21500 amerikan dollary) möçberde puly salgytdan ýaşyrandygyny güman edýärler.

1990-njy ýylda düýbi tutulan “Turan” agentligi häkimiýetleriň aýyplamalaryny ret edýär we olary syýasy matlaply atlandyrýar.