Demirgazyk Koreýa öz lideri Kim Jong Unyň "tiz wagtda" Orsýete sapar etjekdigini we prezident Wladimir Putin bilen duşuşjakdygyny tassyklady.
KCNA resmi täzelikler agentligi Putiniň Kimiň sapary üçin çakylyk ugradandygyny 23-nji aprelde habar berdi, emma onuň haçan boljagyny anyklaşdyrmady.
“Olar (Kim we Putin) saparyň dowamynda gepleşik geçirerler" diýip, KCNA habar berýär.
Orsýetiň "Kommersant" gazetiniň 23-nji aprelde habar bermegine görä, Demirgazyk Koreýanyň lideriniň Wladiwostoga sapary 25-nji aprele bellenipdir. Gazet saparyň taýýarlyk prosesine ýakyn iki sany çeşmä salgylanýar.
18-nji aprelde Kreml Kimiň "apreliň ikinji ýarymynda" Orsýete sapar etmegi planlaşdyrýandygyny aýdypdy.
Putin 26-27-nji aprelde Wladiwostoga we Demirgazyk Koreýa golaý regiona Hytaýa sapar eder. Onuň Pekinde geçiriljek foruma gatnaşmagy planlaşdyrýar.
Günorta Koreýanyň "Yonhap" agentligi Kim Jong Unyň baş geňeşçisiniň 21-nji aprelde Wladiwostokda bolandygyny habar berdi.
Bu duşuşyk ABŞ-nyň prezidenti Donald Trampyň administrasiýasynyň Koreýa ýarymadasyndaky ýadro krizisini tamamlamak ugrunda basyş edýän döwrüne gabat geldi.