Eýranyň prezidentiniň aýtmagyna görä, eger-de dünýäniň täsirli ýurtlary Tähranyň bähbitlerini ABŞ-nyň sanksiýalaryndan goramasalar, Yslam Respublikasy urany ýokary derejede baýlaşdyrmak işlerini dikelder.
Hassan Rohaniniň 8-nji maýda döwlet telewideniýesinde görkezilen halka ýüzlenmesi ABŞ-nyň prezidenti Donald Trampyň Eýran bilen halkara ýadro ylalaşygyndan çykmak kararyny yglan etmeginiň ýyl dönümine gabat geldi.
Rohani ylalaşyga gol çeken beýleki ýurtlaryň - Britaniýanyň, Fransiýanyň, Germaniýanyň, Hytaýyň we Orsýetiň Eýranyň nebit we bank pudaklaryny goramak üçin 60 gününiň bardygyny aýtdy.
Rohani bäş ýurduň liderlerine ýazan hatynda, Eýranyň 2015-nji ýylda baglaşylan ylalaşygyndaky käbir borçnamalaryny kemeldip başlajagyny we ylalaşykda görkezilişi ýaly mundan beýläk baýlaşdyrylan urany we agyr suwy beýleki ýurtlara eksport etmejegini aýtdy.