Kosowanyň Demokratik partiýasy şu hepdäniň ahyrynda geçiriljek parlament saýlawlarynyň öňüsyrasynda, ABŞ-nyň prezidenti Donald Trampyň öňki kampaniýa maslahatçysyny işe aldy.
Sosial mediada jynsparaz mazmunly çap eden maglumatlary üçin 2015-nji ýylda Trampyň kömekçisi wezipesinden çetleşdirilen Sam Nunberg partiýanyň dalaşgärleri üçin “çykyşlary we aragatnaşyk maslahatlaryny taýýarlar”. Bu barada daşary ýurt agenti hasaba almak boýunça 30-njy sentýabrda ABŞ-nyň Adalat departamentine berlen resminamada aýdylýar.
Şeýle-de, Nunberg Kosowadaky saýlawlar barada ABŞ-nyň media guramalaryny maglumatlar bilen üpjün edip, Waşingtondaky resmileri saýlawyň netijeleri barada hem habarly eder.
Resminamada aýdylmagyna görä, düýbi Nýu-Ýork şäherinde ýerleşýän syýasy maslahatça $110000 möçberinde hak tölener. Onuň kontrakty 15-nji dekabrda tamamlanar.
Birleşen Ştatlar Kosowanyň garaşsyzlygynyň iň esasy tarapdarlarynyň biri hasaplanýar we ýurtdaky syýasy partiýalar saýlawlarda sesleri ýeňmek üçin ABŞ bilen berk gatnaşyklaryň bardygyny görkezmäge synanyşýarlar.