ABŞ 29-njy dekabrda Yrakda we Siriýada Eýran tarapyndan goldanylýan şaýylaryň ýarym-harby toparynyň bäş nyşanasyna garşy “goranyş dürs zarbalaryny” amala aşyrandygyny mälim etdi.
Pentagon Yrakda üç, Siriýada hem iki nyşana zarba urlandygyny aýtdy.
Yragyň harby we howpsuzlyk çeşmeleriniň maglumatyna görä, ABŞ-nyň 29-njy dekabrdaky zarbalarynda azyndan 18 ýarym-harby söweşiji öldürilipdir, 50-den gowragy hem ýaralanypdyr. Bu barada Reuters habar berýär.
ABŞ-nyň goranmak sekretary Mark Esper F-15 Bürgüt uçarlarynyň “Kataeb Hizbbullaha degişli dolandyryş we gözegçilik desgalaryna, şeýle-de ýarag ammarlaryna” zarbalary urandygyny aýtdy.
Ol “zarbalaryň şowly” bolandygyny, eger-de “zerurlyk ýüze çyksa” goşmaça urgularyň hem amala aşyrylyp bilinjekdigini aýtdy.
ABŞ-nyň goranmak sekretarynyň kömekçisi Jonathan Hoffmanyň beýanatynda bellenilşi ýaly, “zarbalar Kataeb Hizbbullahyň OIR koalisiýa güýçlerine garşy geljekki hüjümleriniň öňüni alar”.
ABŞ-nyň döwlet sekretary Maýk Pompeo: “Biz amerikan erkeklerine we aýallaryna howp abandyryp biljek Eýran Yslam Respublikasynyň hereketlerine çydam etmeris” diýdi.