Russiýanyň Demirgazyk Kawkaz regiony Çeçenistanda 1944-nji ýyldaky deportasiýanyň pidalaryny köpçülik öňünde ýatlamak çäresi hakyky gününde, ýagny betbagtçylygyň başlan wagtynda bellenildi. Bu waka soňky sekiz ýylyň dowamynda ilkinji gezek 23-nji fewralda geçirildi.
Ýekşenbe güni ýüzlerçe adam, şol sanda ýokary derejeli çeçen resmileri we dini ruhanylar deportasiýanyň müňlerçe pidasynyň hormatyna paýtagt Groznyýnyň merkezinde ýygnandy.
2012-nji ýylda Moskwa tarapyndan goldanylýan çeçen lideri Ramzan Kadyrow Tukatlyk we ýatlama gününi 23-nji fewraldan aýryp, öz kakasynyň jaýlanan gününe, ýagny 10-njy maýa geçiripdi. Ahmad Kadyrow 2004-nji ýylda Groznyýda amala aşyrylan bomba hüjüminde öldürilipdi.
Muňa garamazdan, çeçenleriň köpüsi deportasiýanyň pidalaryny näresmi derejede 23-nji fewralda ýatlamagy dowam etdirdi.
Sowet häkimiýetleri çeçenleriň we inguşlaryň nasistik Germaniýa bilen hyzmatdaşlyk edendigini öňe sürüp, 1944-nji ýylyň 23-nji fewralyndan tä 9-njy martyna çenli olaryň tas ählisini – ortaça 650000 adamy – Merkezi Aziýa deportasiýa etdi.