Kreml tankytçysynyň ýaranlary onuň saglyk ýagdaýy barada aladalaryny beýan edeninden soňra, rus häkimiýetleri tussaglykdaky oppozisiýa syýasatçysy Alekseý Nawalnynyň saglyk ýagdaýynyň “durnuklydygyny” aýtdylar.
Nawalnynyň ýaranlary onuň saglyk ýagdaýynyň ýaramazlaşmagyna hem-de onuň türmede aklawçysy bilen meýilleşdirilen duşuşyga gatnaşmandygyna alada bildirýändiklerini aýdanyndan soňra, Nawalnynyň ýagdaýy we onuň nirededigi baada 24-nji martda mesele gozgaldy.
Nawalnynyň Russiýa boýunça toparlarynyň utgaşdyryjysy Leonid Wolkow korrupsiýa garşy göreşijiniň geçen hepde “ýiti” arka agyrylaryny başdan geçirip başlandygyny we aýagynda ysmazlyk duýandygyny, şeýle-de onuň aýak üstünde durup bilmändigini aýtdy. Wolkow bu agyrylar üçin Nawalna iki sany "Ibuprofen" tabletkasynyň berilendigini sözüne goşdy.
Federal jeza çäresi gullugy (FSIN) 25-nji martda "Interfaks" habar gullugyna Nawalnynyň saklanýan 2-nji düzediş koloniýasynda tussaglaryň bir gün ozal adaty lukmançylyk barlagyndan geçirilendigini aýtdy.
“Barlagyň netijelerine görä, [Nawalnynyň] saglyk ýagdaýy kanagatlanarly we durnukly diýip kesgitlenildi” diýip, FSIN-iň metbugat gullugy habar agentligine aýtdy.
Muňa garamazdan, beýanat Nawalnynyň ýaranlarynyň arasyndaky aladalary ýeňletmedi.