Sepleriň elýeterliligi

Opera aýdymçysy Annagül Annagulyýewa aradan çykdy


Meşhur opera aýdymçysy Annagül Annagulyýewa.

SSSR –iň halk artisti, meşhur opera aýdymçysy Annagül Annagulyýewa uzaga çeken agyr keselden soň, 18-nji iýulda 85 ýaşynyň içinde aradan çykdy.

Türkmen opera sungatynyň ilkinji ýerine ýetirijileriniň biri Annagül Annagulyýewa 1941-nji ýyldan başlap Türkmen Opera-Balet Teatrynda işleýär. Ol bu teatryň sahnasynda “Zöhre-Tahyr” operasynda Zöhräniň, “Şasenem-Garyp” operasynda Şasenemiň, “Kemine we Kazy” operasynda Ogulbegiň, “Ýewgneniý Onegin” operasynda Tatýananyň, “Garahal gelin” operasynda Lizanyň, “Rusalka” operasynda Nataşanyň we başga-da köp gahrymanlaryň keşbini janlandyrýar, olaryň adýymlaryny, ariýalaryny ýerine etirýär.

Teatral-sahna işlerinden başga-da, birnäçe çeper filmde, şol sanda adamysy, SSSR-iň halk artisti, kinorežisser Alty Garlyewiň “Derýanyň aňyrsy-serhet” filminde surata düşýär.

Annagül Annagulyýewany Balkan welaýatynyň Esenguly etrabynda, dogduk obasynda jaýladylar. Beýik artistiň aradan çykanlygy barasynda 20-nji iýulda Türkmenistanyň gazetlerinde Türkmenistanyň prezidentiniň, Ministrler Kabinetiniň hem-de Medeniýet we teleradioýaýlymlar ministrliginiň gynanç haty çap edildi.

Jaýyň jennetden bolsun, türkmen aýdym-saz, opera sungatyna uly goşant goşan, türkmen operasynyň düýbüni tutujylaryň biri bolan Annagül Annagulyewa!

Biz merhumyň ýakynlaryna, dogan-garyndaşlaryna çuňňur gynanjymyzy bildirýäris.

Azat Ýewropa we Azatlyk Radiosynyň Türkmen gullugy

Siziň pikiriňiz

Teswirleri görkez

XS
SM
MD
LG