Orsýetiň ykdysadyýetiniň ösüşiniň haýallygy şu ýyl adamlaryň iş bilen üpjünçilik mümkinçiliklerini gowulandyryp bilmez, işsizlik derejesi ýokary bolmagynda galar diýip, Halkara zähmet guramasy 12-nji ýanwarda aýtdy.
“Global derejede nebitiň bahasynyň pese gaçmagy Ýewropa Bileleşiginiň hem ABŞ-nyň sanksiýalary bilen bilelikde Orsýet Federasiýasynyň ykdysadyýetine agram saldy” diýip BMG degişli guramanyň 2017-nji ýylda dünýäde işsizlik meselesi baradaky hasabatynda aýtdy.
Orsýetiň ykydsadyýetiniň görkezen 1.5% derejesindäki ösüşi geçen ýyldan bäri nebitiň bahasynyň ýokarlanmagyna we Ýewropa Bileleşiginiň “sanksiýalarynyň ýatyrylmagy” baradaky maglumatlara bagly diýlip, hasabatda bellenýär.
Şol bir wagtda-da gurama Orsýetde işsizleriň sanynyň geçen ýylyň derejesinde saklanmagyny çak edýär we 4.3 million adamdan ybarat sany öňe sürýär.