Özbegistanly adam hukuklaryny goraýjy aktiwist we žurnalist Dilmurod Saidow, ýurtda yglan edilen günä geçişe garamazdan, tussag astynda galýar.
Daşkentde ýerleşýän adam hukuklaryny goraýjy “Ezgulik” guramasyndan Abdurahmon Taşanowyň 5-nji fewralda aýtmagyna görä, günä geçiş komissiýasy Saidowyň oktýabrda yglan edilen köpçülikleýin amnistiýada tussaglykdan boşadylmagyny sorap ýazan arzasyny ret edipdir.
Taşanowyň sözlerine görä, häkimiýetler 2-nji fewralda beren jogabynda aktiwisti tussaglykdan boşatmakdan ýüz öwrüp, öz kararyny onuň türmede özüni “erbet alyp barandygy” bilen düşündiripdirler.
“Ezgulik” partiýasynyň öňki agzasy 54 ýaşly Saidow 2009-njy ýylda ogurlykda aýyplanyp, 12 ýyl türme tussaglygyna höküm edilipdi. Onuň özi we tarapdarlary aýyplamalaryň syýasy matlaplydygyny aýdýarlar.
Saidowyň aýaly we ýekeje çagasy bolan gyzy 2009-njy ýylda ony türmede görmäge barýarka ýol heläkçiliginde wepat bolupdy. Saidowyň ejesi 2014-nji ýylda 89 ýaşynda aradan çykdy.
Adam hukuklaryny goraýan halkara guramalary we Günbatar hökümetleri Saidowy syýasy tussag hasap edýärler.