BMG-niň Baş sekretary Täjigistanda adam hukuklaryny gozgady

BMG-niň Baş sekretary Antoniu Guterriş we Täjigistanyň prezidenti Emomali Rahmon bu Merkezi Aziýa ýurdunda adam hukuklarynyň ýagdaýyny ara alyp maslahat etdiler.

Guterrişiň 12-nji iýunda geçirilen gepleşikleriň yzýany žurnalistlere aýtmagyna görä, BMG Täjigistana guramanyň Adam hukuklary boýunça rekomendasiýalaryny berjaý etmäge ýardam berer.

Guterriş Merkezi Aziýa ýurtlaryna edýän saparyny 8-nji iýunda başlap, Gazagystana bardy we regionyň dört ýurduny, Orsýeti, Hytaýy, şeýle-de guramanyň iki sany täze agzasyny Pakistany we Hindistany öz içine alýan Şanhaý Hyzmatdaşlyk Guramasynyň sammitine gatnaşdy.

BMG-niň Baş sekretary 10-njy iýunda Özbegistana we 11-nji iýunda Gyrgyzystana sarap etdi. 13-nji iýunda Guterrişiň Türkmenistana barmagyna garaşylýar.

“Human Rights Watch” (HRW) guramasy 7-nji iýunda çap eden beýannamasynda Guterrişi “Merkezi Aziýanyň liderlerine basyş edip, takyk öňegidişlikleri, şol sanda gynamalaryň, demonstrasiýalara hem söz azatlygyna basyşlaryň soňuna çykmagy talap etmäge” ündedi.