Eýranyň parlamenti ýurduň ykdysadyýet we maliýe ministrini wezipesinden boşatdy. Bu ýurtdaky maliýe kynçylyklary sebäpli prezident Hassan Rohaniniň hökümetine garşy barha artýan nägilelikleriň fonunda bolup geçdi.
Parlamentiň 137 agzasy Masoud Karbasianyň “ýurduň ykdysady ýagdaýyny gowulandyryp bilmändigini” aýdyp, onuň işden aýrylmagyna ses berdi.
Mundan öň, ýurtdaky inflýasiýanyň we ykdysadyýetiň ýagdaýyndan nägile raýatlar Tähranyň we beýleki şäherleriň köçelerine çykypdylar. Rohani iýulyň ahyrynda Merkezi Bankyň başlygyny hem täzeläpdi.
Maýda prezident Donald Tramp ABŞ-ny 2015-nji ýyldaky Eýranyň Ýadro ylalaşygyndan çykarypdy. Şeýle-de, şu aý Waşington Tährana garşy sanksiýalary täzeden girizip başlady.
Eýranyň nebit önümçiligine garşy girizilen sanskiýalaryň ikinji tapgyry noýabrda güýje girer.