Türk harby güýçleri Orsýet we Eýran bilen gelnen ylalaşygyň bir bölegi hökmünde, Siriýanyň Idlib welaýatynyň demirgazyk-günbatarynda patrullyk etmäge başlady.
Türkiýäniň döwlet eýeçiligindäki “Anadolu” habar agentliginiň 8-nji martda beren maglumatyna görä, patrullyk Idlibiň demirgazygyndan başlap, tä Aleppo welaýatynyň günorta bölegine çenli türk serhediniň eteginden dowam edýär.
Türkiýäniň goranmak ministri Hulusi Akar Türkiýäniň ini 15-20 kilometre barabar bolan ýaragsyzlandyrmak zonasynda patrullyk etjekdigini aýtdy. Şol bir wagt, ol Orsýetiň Idlibiň daşyndaky serhet territoriýasyna patrullyk etjekdigini belledi.
Akar orsýetli harbylaryň hem 8-nji martda patrullyga başlamalydygyny aýtdy, ýöne olaryň bu çärä planlaşdyrylany ýaly başlandygy ýa-da başlamandygy häzirlikçe nämälim bolmagynda galýar.
8-nji martda irden “AFP” habar agentliginiň habarçysy Aleppo welaýatynyň çetki günbatar sebitindäki ýaragsyzlandyrmak zonasynda ýerleşýän ýolda türk harbylarynyň 10 çemesi ýaragly ulaglarynyň kerwenini görendigini habar berdi.