Kremliň adam hukuklary boýunça geňeşi rus parlamentiniň ýokarky palatasyna ýüzlenip, “fake news”, ýagny “ýalan habarlary”, şeýle-de rus döwletini we jemgyýetini kemsidýär diýlip hasaplanýan maglumatlary bikanun etjek kanun taslamasyny ret etmäge çagyrdy.
Eger-de, bu kanun kabul edilse, ol pikir azatlygyny çäklendirer diýip, Adam Hukuklary we Graždançylyk Jemgyýeti boýunça Russiýanyň Prezidentiniň ýanyndaky Geňeş özüniň websaýtynda maglumat ýerleşdirdi.
Ol Federasiýa Geňeşine ýüzlenip, kanun taslamany yzyna – parlamentiň aşaky öýi, ýagny Döwlet Dumasyna ugratmaga çagyrdy. Döwlet Dumasy 7-nji martda taslamany tassyklapdy.
Bu kanun resmilere “ýalan habarlar” diýip häsiýetlendiren maglumatlaryny çap edýän websaýtlary petiklemäge, şeýle-de döwlet emeldarlaryna, rus jemgyýetine dil ýetirip maglumatlary çap edenleri jezalandyrmaga mümkinçilik berer.
Geňeş diňe maslahat beriji häsiýete eýedir. Onuň çagyryşlary, aglaba ýagdaýda, prezident Wladimir Putin, onuň hökümeti, şeýle-de rus parlamentiniň iki palatasy tarapyndan-da duşdan geçirilýär.