Russiýanyň meşhur şahsyýetleriniň topary suda çenli öý tussaglygyna höküm edilen derňewçi žurnalist Iwan Golunowy goldap çykyş etdiler. Bu aralykda, 12-nji iýunda Moskwada Golunowyň azat edilmegi ugrunda ýörişi geçirmek göz öňünde tutulýar.
Golunow “uly möçberde” neşe maddalaryny satmak synanyşygynda aýyplanýar. Žurnalistiň özi bulary ret edýär.
Rep we rok ýyldyzlary, meşhur kino oýunçylary wideo ýazgylar arkaly 36 ýaşly Golunowa öz goldawyny bildirdiler. Olar žurnaliste bildirilýän aýyplamalaryň esassyzdygyny we syýasy matlaplara esaslanýandygyny aýdyp, rus resmilerinden olaryň aradan aýrylmagyny soradylar.
Golunowy goldap çykyş edenleriň arasynda belli repçi Oxxxymiron, DDT toparynyň öňdebaryjy agzasy Ýuriý Şewçuk, sazanda Boris Grebenşikow we režisýor Andreý Zwýaginsew dagy hem bar.
12-nji iýundaky ýörişiň guramaçylary Golunowa bildirilýän aýyplamalaryň aradan aýrylmagyny we toslanandygy aýdylýan aýyplamalaryň arkasynda duranlaryň jezalandyrylmagyny talap etjekdiklerini aýtdylar.