Eýranyň paýtagty Tähranda, koronawirusyň ýaýramak howpy sebäpli, juma namazlary ýatyryldy. Bu barada resmi media maglumat berýär.
Bu aralykda, soňky günüň dowamynda ýurtda wirusa täze 100-den hem aşa adamyň, şol sanda Eýranyň aýallar we maşgala boýunça wise-prezidenti Masoumeh Ebtekaryň hem ýolugandygy tassyklandy.
Mundan öň, 25-nji fewralda Eýranyň saglyk ministriniň orunbasary Iraj Harirşiniň hem COVID-19 wirusy bilen keselländigi mälim edildi. Harirşä wirusyň ýaýramagynyň öňüni almak boýunça çäreleri görmek tabşyrylypdy.
Eýranyň mediasy Ebtekaryň tutuş toparynyň wirusa ýokuşyp-ýokuşmandygy boýunça barlanjakdygyny habar berýär.
Eýranyň Saglyk ministrilgi wirusdan ölenleriň sanynyň 26-a ýetendigini aýtdy.
Eýranda wirus sebäpli Hytaýyň daşynda heläk bolan iň köp adam hasaba alyndy.
Resmi maglumata görä, Eýranda umumy hasapda 245 adam wirus bilen keselläpdir.
Ženewada BMG-niň saglyk başlygy Tedros Adhanom Ghebreýesus eger-de zerur çäreler dessine görülse, onda koronawirusyň kontroldan çykmagynyň öňüni alyp boljakdygyny aýtdy.
“Biz kesigtleýji nokada geldik. Bu wirusyň pandemiýa geçmek howpy bar” diýip, Ghebreýesus belledi.
Dünýäniň 40-dan gowrak döwletinde COVID-19 wirusyna 82 müň adam ýolugdy. Olaryň aglabasy Hytaýda. Täze wirusdan dünýä boýunça 2 müň 700 adam öldi.