Gazagystan şu ýyl, koronawirus epidemiýasy sebäpli, watan goragçylarynyň gününi däp bolan harby parady gurnamazdan belledi.
Prezident Kasym-Žomart Tokaýew 7-nji maýda merkezi aziýa ýurduny 1992-nji ýylda Gazagystanyň ýaragly güýçleriniň döredilen güni bilen gutlady. Bu gün öňki ýyllarda harby parad bilen bellenilipdi.
Saglygy goraýyş edaralary 7-nji maýda koronawirus ýokaşanlaryň sanynyň 4530-a ýetendigini, ýurtda bu keselden 30 adamyň, ýagny sebitde iň kän näsagyň ýogalandygyny aýtdy.
Goňşy Gyrgyzystanda häkimiýetler birnäçe hassanyň we medisina işgäriniň COVID-19 synaglary oňyn netije görkezenden soň, Bişkegiň esasy çagalar hassahanasynyň işini togtatdy.
Saglygy goraýyş ministriniň orunbasary Nurbolot Usonbaýew hassahananyň täze hassalary kabul etmegini bes edendigini, ozal kabul edilenleriň koronawirus barlagyndan geçirilýändigini aýtdy.
Usonbaýew ýurtda 895 koronawirus näsagynyň hasaba alnandygyny, şolardan 12 näsagyň keseliniň ölüm howplydygyny aýtdy.
Özbegistanda häkimiýetler koronawirus näsaglarynyň sanynyň 2266 adamdygyny, şol sanda 10 adamyň ölendigini aýtdy.
Täjigistanda soňky sanlar 379, şol sanda 8 adam öldi. Türkmenistanda ýekeje-de resmi hasaba alnan koronawirus näsagy ýok. Hünärmenler ýurtda aç-açanlygyň we garaşsyz metbugatyň ýokdugyny nazara alyp, bu aýdylýana şübheli garaýarlar.