7-nji iýunda Niderlandlaryň sudy 2014-nji ýylda Malaýziýa howa ýollarynyň MH17 uçaryny Ukrainanyň üstünde oka tutup, ýere gaçyrmakda şübhe bildirilýän üç rus we bir ukrain raýatyna garşy subutnamalary diňläp başlar.
Kazyýet işi resmi taýdan 2020-nji ýylyň mart aýynda başlandy, ýöne şu wagta çenli dowam edýär we 298 adamyň ölmegine getiren heläkçiligiň sebäplerine degişli subutnamalara garaýar.
MH17, 2014-nji ýylda Amsterdamdan Kuala-Lumpur şäherine barýan ýolda, Ukrainanyň gündogaryndaky Moskwa tarapyndan goldanýan separatistleriň gözegçiligindäki regionyň üstünden geçen wagtynda Russiýada öndürilen Buk ýer-howa raketasy bilen atyldy.
Şübhe bildirilen dört adam bu betbagtçylyga gatnaşmak aýyplamasy esasynda Gaaganyň kazyýetinde gaýybana sud edilýär. Olaryň diňe biriniň aklawçysy suda gatnaşýar.
Sud edilýän dört adam Kiýew bilen söweşýän separatist gozgalaňçylaryň arasynda möhüm wezipe eýelemekde aýyplanýar.
Halkara derňewçiler topary 2018-nji ýylyň maý aýynda uçary atmak üçin ulanylýan raketa atyjy enjamyň Russiýanyň 53-nji uçara garşy raketa brigadasyna degişlidigi barada netijä geldi.
Sud işiniň Niderlandlarda geçirilmegi heläk bolan uçaryň Amsterdamdan ugrap, içindäki ýolagçylaryň 196-synyň niderlandly bolmagyna degişli. Niderlandlaryň hökümeti Moskwany jogapkär hasaplaýar.
Russiýa munuň bilen baglanyşygy ret edýär.