Türkmenistanyň Harby-Deňiz güýçlerine ulanylmaga berilen täze harby gämisi Türkiýäniň “Dearsan” gämigurluşyk kompaniýasy bilen bilelikde guruldy. Bu barada harby tehnikalar boýunça habarlary çap edýän janes.com neşiri habar berýär.
Neşir bu gäminiň 2019-njy ýylda Stambulda geçirilen Goranyş industriýasynyň Halkara sergisinde gazanylan ylalaşyk esasynda “Gülhan we Dearsan” bilelikdäki türk kompaniýasy bilen Türkmenistanyň hyzmatdaşlyk etmeginde gurlandygyna ynanylýandygyny habar berýär.
11-nji awgustda Türkmenistanyň döwlet telewideniýesi Türkmenistanyň Harby-Deňiz güýçlerine “Deňiz han” atly täze harby gämisiniň ulanylmaga berilendigini habar berdi.
Döwlet mediasy gäminiň Türkmenistanyň Goranmak ministrliginiň abatlaýyş kärhanasynda gurlandygyny habar berýär.
Azatlyk Radiosy mundan ozal, geçen ýylyň tomsunda “Gülhan we Dearsan” bilelikdäki türk kompaniýasynyň işçileriniň pandemiýanyň fonunda Türkmenistandan ewakuasiýa edilmegi barada habar berdi.